La grande boutique

Gant Bertrand Dupont, rener La Grande Boutique, eo kaset war-raok ar raktres arzel, hag aet eo pell a-walc’h. « Ur raktres estlammus eo, ha n’en deus ket e bar e bro-Frañs, rak amañ e ambrougomp penn-da-benn an arzourien o krouiñ sonerezhioù a-vremañ diwar sonerezhioù hengounel. ». Resisaat a ra Bertrand Dupont : « Liammet strizh eo ar raktres-mañ ouzh ar gompagnunezh produiñ sonerezh AMAB Ton All Produktion. Ambroug an arzourien a zegemeromp amañ en annez evit o c’hrouidigezhioù, aozañ un droiad evito, enrollañ anezho, aze emañ pal ar framm renet ganin ». Ouzhpennañ a ra : « Merour on ivez, ha nann-goprad, eus Innacor Records & Booking, al label bet savet gant Jacky Molard hag Erik Marchand, gant ar pal skignañ sonerezh a-vremañ e Breizh ». Al label, koulz hag an ti-produiñ a zo e framm raktres arzel La Grande Boutique. Da skouer ar grouidigezh Ceòl Mòr gant Patrick Molard hag e sonerien binioù bras er stumm orkestrel, en diskar-amzer 2015, evel ma resisa Bertrand Dupont.

Daoust d’al lañs gant e raktresoù e verzh Bertrand Dupont an diaesterioù a chom da broduiñ ha da skignañ ur sonerezh dibaot hag espar. « Koustus ha bresk eo, rak luzietoc’h-luzietañ eo kavout ken-broduerien ha ken-skignerien », eme c’hoazh Bertrand Dupont. Lakaat a ra war-wel pegen pouezus eo reiñ ul label d’al lec’hioù krouiñ hag arnodiñ, evel hini Langoned, evit ma vefe savet ur sinergiezh etre an obererien. Ur gudenn all a chom : lakaat an abadennoù hag an arzourien da dreiñ dre ar bed, pezh a zo diaes a-walc’h dre ma ranker kaout ur viza da bep hini, eme c’hoazh ar rener.

Gant an holl produksionoù-se e vez maget ul lusk en dachenn-se a Greiz-Breizh. Hag e 1997 e oa e diwar-bouez DAW : ur gouel kentañ a ginnige un tregont abadenn bennak, e-doug daou viz, ha gant un tregont bennak a gevelerien. Hag hiriv eo La Grande Boutique hag e gevelerien a ginnig ur programm diouzh ar mare-bloaz, war ar bloavezh a-bezh : « Le Plancher, ul leurenn e Kreiz-Breizh ». Ul leurenn war-vale war un dachenn a c’hell desachañ ar 100 000 bennak a dud o chom enni, e lec’h en em gav tri departamant, gant arvesterien feal met ivez arvesterien nevez. Ar roll abadennoù-se, kreizennet war an tiriad, a c’hell tennañ gounid eus skoazell ur rouedad kevredigezhel startijenn ennañ, daoust ma vank ingal a-walc’h lec’hioù evit degemer an arzourien war un ton dereat a-walc’h. Paket gant ar soñjoù-se e ouzhpenn Bertrand Dupont ur preder nevez : « Ur raktres a vefe treiñ sal-dañs gozh La Grande Boutique en ur sal abadennoù 300 plas enni, en ur virout ar plañchod, evel-se e vefe talet ouzh ezhommoù tud ar vro ».

Ul lodenn all, ha n’eo ket ken anavezet an obererezh sevenadurel war-zu yaouankizoù an tiriad. Obererezhioù « Sonerezh ar bed », kinniget d’ar c’humunioù evit ar mareoù obererezhioù tro-skol da skouer. « Mod-all e kinnigomp 3 arvest hag a ro tro d’an arvesterien yaouank da vevañ ur prantad dibar a-drugarez da sonerezhioù pobloù ar bed. Un hentenn sevenadurel ha geopolitikel a ginnigomp aze », a zispleg deomp ar rener. Div wech ar bloaz abaoe pemp bloaz e vez embannet kelaouenn sevenadurel al Leurenn, Kreizy Breizh, diwar pezh a zo lakaet war-wel gant skolajidi ha liseidi pedet hag o c’helennerien, ur c’hazetenner, ul luc’hskeudenner. « Dre ar gazetenn-se e lakaer war-wel pezh zo bet un ur gwir zizoloadenn evit tud yaouank zo n’o doa morse gwelet ur sonadeg », eme c’hoazh Bertrand Dupont.

Hervez an arzourien a vez pedet hag ar gevelerien bennañ evel DROM hag Erik Marchand e vez aozet kentelioù mistri gant skolioù sonerezh ha pleustradegoù foran. Degouezhioù a‑zoare a zeu war wel : « Gant ar soñj sevel kronikennoù radio gant ar re yaouank emaomp, skignet e vint war ur web-radio, gant skoazell Antoine Chao, sevener an abadenn « Là-bas s’y j’y suis » gant Daniel Mermet war France Inter. Deuet e oa da ginnig ur grouidigezh son savet diwar sonioù ha sonerezhioù emgannoù ha stourmoù, bet dastumet e-doug meur a vloaz a reportajoù », a resisa Bertrand Dupont.

Gouzout a oar ivez e c’hello tennañ gounit eus ur rouedad bet staliet e-doug bloavezhioù. Menegomp an emgav gant Françoise Degeorges, kelaouennerez e France Musique, sevenaerez an abadenn Couleurs du monde en doa lakaet da zont da wir ar gouel gant an anv-se. Ur gouel war pevar devezh evit lakaat war-wel hentennoù divoaz, gant un dek bennak a strolladoù o tispakañ o arz dirak ur mil bennak a arvesterien : « A-ratozh hon eus dibabet ur roll abadennoù a bik ar galon, gant un niver bihan a‑walc’h a arvesterien, evit ma chomfe tost an arvesterien, dezho da c’hellout klevet eus ar gwellañ … », eme c’hoazh Bertrand Dupont.

Hag evit klozañ : « Amañ, war leurenn La Grande Boutique e kinnigomp krouidigezhioù lañsus, dre nerzh ur roll abadennoù diouzh ar mare, gant obererezhioù sevenadurel war an tiriad, a c’hell magañ ar monedoneoù etre amañ, lec’h all, hag ar bed. Pezh a ra e vefe hep par hor raktres, pezh a ro tro deomp da gaout ur sell nevez war ar grouidigezh a-vremañ e Breizh… ».

Christine Barbedet – miz Ebrel 2016